Разочарувачки е што по три децении независност и три генерации на политичари Македонија е земја во која просперитетот е само збор во политичка кампања. Земја во која 500.000 наши сограѓани живеат под прагот на сиромаштија. Земја во која царува корупцијата, непотизмот, криминалот.

Затоа, горда сум што не припаѓам на деформираниот и ретрограден корумпиран политички естаблишмент. Горда сум што можам да кажам дека припаѓам на генерација која е сведок на сите неправди и која знае како да ги исправи.

Стојам пред Вас храбри и чесни луѓе со идеја, начин и желба да ја направиме Македонија место кое како наш дом е одраз на слобода, просперитет и правда. Стојам пред вас со Нова Алтернатива.

Политиката мора да биде натпревар на идеи, проекти, методи и понуда за подобар живот – наспроти досегашното поимање на политиката како начин за стекнување привилегии и брзо збогатување. Политиката не смее да биде извор на поделби и раздор, туку точка на зближување и мост за надминување на проблемите преку дијалог.

Додека го разединуваа и раскаруваа народот, политичарите живеат во благостојба. Договорени за спас од одговорност за корупцијата и криминалот.